Ortuondoren iritziz, “ez dugu ahaztu behar oraindik beste urrats oso garrantzitsu bat egin behar dugula, eurodiputatuok ere geure hizkuntzan mintza gaitezen herritarren ordezkaria den erakundeko Osoko Bilkuretan egiten ditugun hitzezko esku-hartzeetan. Era horretan, euskaldun, katalan eta galiziarren hizkuntzak kultur elementuak direla eta ezberdinak direla onartzea sustatuko da”.

Amaitzeko, EAJren eurodiputatuak gogorarazi du “Europako Alderdi Popularreko zazpi presidenteordeek gutuna bidali ziotela joan den astean Josep Borrell Europako Parlamentuaren presidenteari, gai hori Mahaiaren aztergaien zerrendatik ken zezan, berriro bozka zedin ekiditeko. PPEk kontrako botoa eman du berriz ere; horrek garbi uzten du ez bakarrik bere jarrera intolerantea, baizik eta baita Europako errealitatearekiko bere deskonexioa ere”.