Ekitaldia Baluarteko areto nagusian egin zen eta, bertan, Nafarroa Baik politika egiteko modu berriaren aldeko apustuaren berri eman zuen. "Bada mundua ikusteko beste era bat, bada jokatzeko beste modu bat" lemapean, Nafarroa baik beste ikuspegi batzuk, beste balio batzuk, proposatzen ditu, adibidez polietika, unibertzale, emakumentalitate, euskerabili, homosentsibilitate, konpartizipazioa edo kontsumoderazioa bezalako hitz berriak. Azken batean, Nafarroa aldatzeko kultura politiko berria proposatu zuen.

Patxi Zabaleta eta Uxue Barkos hautagaiek ere ezberdinen arteko topaketaren ideia hori, eta politika polietika bihurtzekoa azpimarratu zituzten. Lehenengoak aldaketa "itzuliezinaren" alde egin zuen, solidaritatean, aniztasunaren defentsan, aurrerapenean, askatasunean eta guztien arteko bizikidetzan oinarrituz "UPN barne". Bestalde, Iruñeako Alkatetzarako hautagaiak "lagunei alokatutako" Nafarroa izan zuen hizpide, lehiakortasuna galtzen doan egoera ekonomikoa bezalaxe. Maiatzaren 27an "gauza gehiegi jartzen dira jokoan etxean geratzeko" adierazi zuen, eta abstentzioa "gauzek bere horretan jarraitzearen aldeko jarrera dela, berdinarekin jarraitzearen aldekoa, eskuinaren babesaren aldekoa" esan zuen.

Ekitaldian, koalizioa eratzen duten lau alderdietako kideek eta kide askeek ere parte hartu zuten. Nafarroako EAJren buruak, Jose Angel Agirrebengoak, Nafarroa Bairen oinarrizko balioak azpimarratu zituen: gardentasuna, demokrazia, aniztasuna, parte-hartzea eta pertsonak jardun politikoaren ardatz moduan. Halaber, honakoa adierazi zuen: "egun harro egon gaitezke aukera politiko berri hau, berme hau eta gizarte nafarrarentzako aldaketa eskaintza hau aurkezteaz".