Santi Altzugurunek adierazi du, hauteskundeetan irabaziz gero, lehendabiziko ekintza «kargu berrira ohitzea eta udal-funtzionamendua ezagutzea» izango dela, «esperientziarik gabea» delako kargu publikoetan. Ziur dago bere hautagaitzaren balioaz, «lantalde egokia osatzeko gauza diren pertsonaz osatutako taldearen balioaz», hain justu.

Programaren ardatzei dagokienez berriz, hiru nabarmentzen ditu. Lehenik eta behin, Udalak zerbitzu publiko gisa jardutea. Gai horren inguruan, uraren eta saneamenduaren arazoa konpontzea planteatzen du, bai eta bide-sarea hobetzea -hala herri barruan, nola inguruko auzoetan- eta hilerria handitzea ere.

Bigarrenik, EAJren hautagaiak arlo ekonomikorako hauteskunde programako proposamenak aipatu ditu. Hala, lehen sektorea indartzeko planteamendua egiten du ekimen berriak bilatuta, bai produktuak ekoizteko, bai merkaturatzeko. Horrez gain, dagoen industriagune urria ahalik eta ondoen aprobetxatzea lortu nahi du, bertako lana sustatzeko. Eta merkataritza sektorea ere bultzatu nahi du Berako eta Ibardingo merkataritza elkarteekin lankidetzan.

Azkenik, Santi Altzugurenek hainbat ekimen planteatu ditu gizarte, kultura, gazteria eta trebakuntza alorretan.