Hitzarmenaren oinarria ahal den tokietan boto gehien jaso dituen alderdi horietako zerrenda babestea da, hala, alkatetza lor dezan. Ondorioz, Nafarroa Baik Barañaingo, Zizur Nagusiko, Altsasuko eta Atarrabiako alkatetzak lortuko ditu. Burlatakoa eta Erriberrikoa, berriz, sozialisten esku geldituko dira.

Sei udalerri horiek 80.000 biztanle inguru dituzte guztira eta gehienak Iruñeko eskualdean daude.

Nafarroa Baik astelehenean azaldu zuenaren arabera, joan den maiatzaren 27an herritarrek adierazitako aldaketa politikoaren nahia gauzatzeko lanean ari da, bai foru instituzioetan bai udaletan. Nafarroa Baiko ordezkari Txentxo Jiménezek lortutako akordioa positibotzat jo du, eta «udaletako politikan egonkortasunaren, eraginkortasunaren eta efikaziaren printzipioak erabilita» lan egingo dutela esan du.