Nafarroa Bai oso kritiko agertu da PSNk hartu duen jarrera dela-eta. Edonola ere, lanean jarraituko duela adierazi du, hauteskundeetan adierazitako aldaketa nahiak egia bilaka daitezen. Dena dela, Patxi Zabaletak gogorarazi du UPNk sozialistengana gerturatzen jarraituko duela: «Eta hurrengoa Gobernuko presidentetza Purasi eskaintzea izango da, Gobernu partekatua izateko».

Fernando Puras hautagai sozialistak, berriz, azaldu du Parlamentua osatzeko gertatu denak, bere ustean, ez duela eragotziko Nafarroa Bairekin elkarrizketak izaten jarraitzea Nafarroako Gobernua osatzeko. Edonola ere, UPNri aterik ez diola itxi ere jakinarazi du Purasek.