Taldearen bozeramaile den Uxue Barkosek iragarri du Nafarroa Baik Yolanda Barcinaren taldeak garatuko duen jarduna "kontrolatuko" duela. Koalizioa "ekintza positiboak" bultzatzeko aukera hausnartzen dabil, udalbatzaren "gaitasun politikoa" berreskuratzeko UPNk gehiengo absolutua ez duen aukera honetan.

Osoko Bilkuran eztabaidatzeko aurkeztutako ekimenen artean, NaBaik hurrengoak eskatuko ditu: Iruñeko Udala Gerra Zibilean fusilatu zituztenen omenez egindako Sartagudako Memoriaren Parkean "parte-hartzaile" izatea; 1978ko Sanferminetan eraildako German Rodriguezen hilarria birjartzea; alokairuko etxebizitza sustatzean bitartekari izateko bulegoa sortzea; Etxez-etxeko Arreta Zerbitzua kudeatzeko udal enpresa publikoa sortzea; Udaltzainen burua gaitzestea eta postutik kentzea Euskal Jaia husterakoan poliziak izandako jardunbideagatik; eta akordioa egitea hiriko kale batek orain bi urte hil zen Jose Antonio Iturri kazetari eta kronistaren izena har dezan.