Nafarroako Gobernuko Kultura eta Turismo Departamentuak «Amaiur 1982-2007» erakusketa eta Amaiurko gazteluaren konkistaren gaineko hitzaldia antolatu ditu, obeliskoa zaharberritu zutela 25 urte bete direla baliatuz.

EAJk protesta egin du, ekitaldietara ez dituztelako Baztan Haraneko Udala eta Amaiurko zinpeko alkatea gonbidatu; edukazio eta zuzentasun eza dela iritzi diote. Era berean, 1522. urtean Nafarroako Erresumaren legitimitatea defendatu zutenen ohorezko monolitoa zaharberritu zutenak gonbidatu ez izana ere salatu dute.

Aipatutako udal taldeak gogorarazi du Nafarroako Gobernuko sailburuaren jarduteko modu hau gertatu izan dela lehenago ere. «Nahikoa bestelakoak dira oraingo jarrera eta 1982. urtean, berriro inauguratzeko ekitaldian eta beste gestioetan, aurreko gobernuko ordezkariek eta Foru Aldundiko beste kide batzuek erakutsitako jarrera», adierazi du EAJko udal taldeak.