Alde horretatik, adierazi du Miguel Sanz Madrilen hartutako erabaki batengatik dela Nafarroako Gobernuko presidente: «PPren eta PSOEren arteko erabakia izan zen, nafar gehienen nahia alde batera utzita, aldaketarako Gobernu progresista baten aldeko apustua egin baitzuten».

NBBko presidenteak nafarren erabakitzeko eskubidea errespetatzeko deia egin du, «ETAren zitalkeria eta Madrilen hartutako erabakiak egon arren». Alde horretatik, hauxe nabarmendu du: «Nafarroako gizartearen aniztasun balioa elementu konsustantziala da, aberasgarria eta positiboa. Eta EAJk elkarbizitza horren alde lanean jarraituko du Nafarroan, aniztasuna eta aldaketa progresista aintzat hartuta. Betiere Nafarroa nafarrek nahi dutena izango dela kontuan hartuta».