Sainz Pezonagak Pascual Erasoren egunkarietako ekoizpenaren bitartez kontatzen dizkio irakurleari haren obra eta bizitza. Ekoizpen hori bereziki esanguratsua izan zen Euzkadi egunkarian. Corellarrak defendatzen zuen erriberatarrak nafarrak direla eta nafarrak euskal herritarrak, eta inguru bakoitzari dituen beharrizanen arabera egin behar zaiola jaramon. Hala, idatzi zuen azken zutabeetako batek izenburu hau zuen: «Gu, erriberatarrak. Euskal herritarrak, baina gure erara».

1936an Estatutua onartu ostean, Diego Pascual Eraso euskaldun berriak goi-mailako kargua bete zuen Eusko Jaurlaritzako Kultura Sailean. Handik gutxira, atzerrira joan zen eta euskal kolonietako entseina pedagogikoa sustatu zuen.

Pamielak argitaratutako liburuak CD-Roma ere badu Pascual Erasoren obra osoarekin, bai testu formatuan, bai faksimile erreprodukzioan.