Nafarroa Bairen zinegotziaren aburuz ulertezina da “zoritzarrez bizi ditugun krisi aldi hauetan, hiritargoari erakundeen aldetik etengabeko sakrifizioak eskatzen zaizkion une hauetan, pentsaezina da zerga bidez hartzen den dirua guztiz alferrekoak diren lanetan, erreformetan eta bulego apainketetan xahutzea”. Jardunbide horrekin “ez zaie hiritarrei eredurik eskaintzen” azpimarratu du Navarrok.

     “Halaber, Alde Zaharraren biziberritzeari lagundu nahi badiogu, Iruña Zaharraren benetako bihotzaren alde egin nahi badugu, merkatari eta ostalarien onerako, ezinbestekoa da turismo bulegoa dagoen toki berean geratzea, Iruña bisitatzen duten pertsonak erakartzeko elementu gisa” azaldu du Rosana Navarrok. Arrazoi horiengatik guztiengatik, udalari eskatu dio Nafarroako Gobernuari zuzendutako eskaria egin dezala leku aldatzea gauzatu ez dadin “beharrezkoa ez delako” eta “zentzugabea delako hiriaren interesen kontra joatea”.