Mitxelenaren iritzian, "Nafarroako Gobernuak ez ditu etxeko lanak egin; errepideak bukatua behar zuen 2007rako, eta orain, ordea, obraren burutzapenean aurreikusirik dagoenez, ez dute 2010-2012ra arte amaituko". Ildo horri jarraiki, Lesakako alkateak dio "aldi berean burutzen ahal direla Bera-Endarlatsa eta Igantziko Bentak-Bera bidetarteak, inolako arazorik gabe, zeren azkeneko bidetarte hau burutzapen berriko trazatua baita ehuneko laurogeita hamarrean".

"N-121-A errepidea hobetzeko asmoa erakusteko bide ona izango litzateke hori, hots, obrak ahalik azkarren eta eperik laburrenean burutzea —adierazi du alkate lesakarrak—. Gainerako kontua, hau da, Gipuzkoako Aldundiarekiko negoziazioan aitzakien bila ibiltzea edo, orain gertatu den bezala, Bortzirietako herritarrei pazientzia eskatzea, erantzukizuna albo batera uztea besterik ez da, eta guk, Administrazioa hori ordaintzen dugunez, hori guztia exijitzeko eskubide osoa daukagu".